Директното продолжение на филмот „Ghostbusters“ од 1984 година заработи 44 милиони долари од премиерното прикажување во Северна Америка, што е одличен успех во време на пандемија.
Ова е голем успех за Sony, кои во 2016 година имаа неуспех со женската верзија на „Ghostbusters“. Филмот е во режија на Џејсон Рајтман и е продолжение на славниот филм „Ghostbusters“ од 1984 година, во режија на неговиот татко Иван Рајтман.
Улогите во филмот ги толкуваат Кери Кун, Ени Потс, Пол Рад и други. Дејството го следи животот на самохрана мајка и нејзините две деца кои пристигнуваат во мал град и откриваат поврзаност со оригиналните истерувачи на духови и тајната која нивниот дедо ја оставил зад себе, пишува Hollywood Reporter.
Уште еден филм беше премиерно прикажан, станува збор за „King Richard“ со Вилс Смит како Ричард Вилијамс, таткото на тениските ѕвезди Серена и Венус Вилијамс. Филмот се најде на четвртото место со разочарувачки 5.7 милиони долари.
На второто место се најде „Eternals“ на Marvel и Disney, со заработка од 10.8 милиони долари. На третото место е „Clifford the Big Red Dog“ со 8.1 милиони долaри, додека „Dune“ е на петтото место со 3.1 милион долари од петтиот викенд на прикажување.