Руската актерка и режисерот кои поминаа 12 дена на Меѓународната вселенска станица (МВС) за да го снимат првиот филм во вселената, вчераутро слетаа на Земјата.
Вселенското летало Soyuz MS-18 што ги носеше Јулија Пересилд, Клим Чипенко и космонаутот Олег Новицки, слета во казахстанската степа точно во закажаното време, 4 часот и 36 минути. Руската вселенска агенција го пренесуваше слетувањето на Soyuz во живо.
Роскосмос објави на Twitter дека спуштањето е успешно и дека „тимот се чувствува добро“.
Космонаутот и филмското дуо на местото на слетување беа поздравени од директорот на руската вселенска агенција, Димитриј Рогозин.
Желбата на рускиот тим, кој полета од космодромот Бајконур во Казахстан на 5 октомври, беше да се „претрка“ ривалскиот американски проект со Том Круз.
Нивниот филм со привремен наслов „Предизвик“ е за жена хирург која патува на МВС за да го спаси животот на еден космонаут.
Во контекст на руско-американското ривалство, оваа филмска авантура потсетува на почетокот на вселенското истражување, 60 години откако тогашниот СССР го испрати во орбитата првиот човек, Јуриј Гагарин.
