Легендарниот фудбалер на Манчестер Јунајтед, Рајан Гигс, во изјава за англиските медиуми рече дека „Црвените Ѓаволи“ направиле голема грешка што во своите редови не ги довеле Габриел Жезус и Килијан Мбапе.
Велшанецот открива дека уште пред неколку години ги гледал овие двајца млади играчи, односно дека клубот од „Олд Трафорд“ можел да ги доведе во своите редови по цена од само пет милиони фунти.
„Го гледав Габриел Жезус уште пред три години, додека Мбапе го следев цела година. Натпреварите ги следев со скаут и тука немаше за што премногу да се размислува, беше јасно за какви играчи станува збор. На сите и зборував дека треба да ги купиме, а тогаш би не чинеле околу пет милиони фунти. Реков дека треба да ги купиме и да ги испратиме на позајмица додека не созреат, а тоа ќе беше одлична опција“, изјави Гигс за „Times“.
Жезус во оваа сезона постигна осум погодоци во дресот на „Граѓаните“, додека Мбапе на истиот број на постигнати погодоци во француската Лига 1, додаде и осум асистенции.
Манчестер Јунајтед после 18 одиграни натпревари во англиската Премиер лига се ноаѓа на втората позиција со 11 поени помалку од првопласираниот ривал Сити, а во следното коло ги очекува дуелот против Лестер на гостински терен.
