Кога ќе се лансира Grand Theft Auto VI, не очекувајте извршниот директор на Take-Two Interactive да посегне по контролер.
Како и милиони други, и ние ги одбројуваме деновите до лансирањето на Grand Theft Auto VI. Сепак, кога игрицата ќе се појави на полиците и дигиталните продавници, а гејмерите ширум светот ќе се најдат на улиците на Vice City, шефот на компанијата во сопственост на Rockstar Games нема да биде еден од нив - бидејќи тој „не е гејмер“.
Во интервју за CNBC, Страус Зелник, извршен директор на Take-Two, откри дека нема да ја игра GTA 6. Запрашан да го коментира своето искуство со игрицата, Зелник рече дека има различни цели поради улогата во која се наоѓа.
„Не сум гејмер, не баш - не играм видео игри. Мислам дека е погрешно извршен директор да биде извршен директор-потрошувач во индустријата за забава“, рече Зелник, разјаснувајќи го своето мислење за улогата во која е. „Не бев извршен директор-потрошувач ниту во филмската, телевизиската ниту во музичката индустрија, иако сигурно можев да читам сценарио и несомнено ја сакам музиката - но тоа не е мојата улога. Мојата улога е да ги привлечам, задржам и мотивирам најдобрите таленти во бизнисот, а потоа да им се тргнам од патот“.
Во интервјуто, Зелник се осврна и на одложувањето на GTA 6, бранејќи го потегот како дел од визијата на Rockstar Games да создаде една од најдобрите игрици досега.
„Тоа е прилично кратко одложување, помалку од 6 месеци. Општо земено, кога ќе објавиме датум што е сигурен, можеме да го исполниме. Клучот е во тоа што Rockstar Games се обидува да го создаде најдоброто нешто што некој го видел во индустријата за забава - не само интерактивна забава. Потрошувачите имаат големи очекувања за игрицата“, вели Страус Зелник.
Лансирањето на Grand Theft Auto VI е закажано за 26 мај 2026 година, а најочекуваниот наслов на сите времиња прво ќе биде достапен за сопствениците на конзолите PlayStation 5 и Xbox Series.
