По само еден месец, одлуката за блокирање на популарниот сајт беше променета.
Популарната веб-страница за возрасни Pornhub (во сопственост на компанијата Aylo) повторно им овозможи пристап на корисниците во Франција, помалку од еден месец откако беше привремено блокирана за повеќе од 68 милиони луѓе.
Оваа одлука следеше по интервенцијата на Францускиот управен суд во Париз, кој оцени дека владата ги прекршила прописите на ЕУ при воведувањето строги проверки на возраста на корисниците.
Блокадата беше воведена на почетокот на јуни, откако Франција претстави нов закон со кој од платформи како Pornhub се бара верификација на возраста преку кредитна картичка или официјална лична карта – значителен напредок во однос на досегашното едноставно „кликнување“ за потврда на возраста.
Pornhub потоа се одлучи за драстичен чекор – го блокираше пристапот до својата страница во Франција, истакнувајќи дека таквите барања ја загрозуваат приватноста на корисниците и претставуваат ризик од протекување на чувствителни податоци. Наместо тоа, компанијата предлага „верификација базирана на уред“ – децентрализиран систем кој би ги принудил производителите на уреди како Apple, Google и Microsoft да спречат пристап на тинејџерите без директно вмешување на веб-страниците.
На правен план, францускиот суд пресуди дека владата не ја почитувала процедурата на ЕУ, според која мора да ја извести компанијата од друга држава (Aylo е регистрирана на Кипар), како и Европската комисија пред примената на мерката. Како резултат, барањето за верификација на возраста е укинато, а Pornhub повторно стана достапен.
Од Aylo истакнуваат: „Французите заслужуваат регулатива која ги штити децата од пристап до содржини за возрасни, но и ја штити нивната приватност и чувствителните податоци“.
Сепак, француските власти – вклучувајќи ја и Клара Шапаз, министерката за дигитални содржини – најавија можност за повторно блокирање, па се очекува овој спор наскоро да продолжи на повисоки инстанци.
