Масовен прекин на интернетот зафати десетици веб-страници, банки, онлајн игри и апликации, вклучувајќи ги Amazon, Snapchat и Vodafone.
Проблемите започнаа утрово и се чини дека се поврзани со тешкотии во работата на Amazon Web Services (AWS), објавува Sky News. Компанијата објави дека „итно работи на отстранување на проблемот“.
Исто така, на својата страница за следење на статусот на услугите, компанијата објави дека бележи зголемена стапка на грешки и доцнења во работењето на неколку AWS услуги.
Според страницата Downdetector, само во САД се регистрирани повеќе од 2.000 извештаи поврзани со падот на Amazon Web Services.
Меѓу апликациите и услугите погодени од проблемите се, покрај веќе споменатите, Ring, Clash Royale, Life360, MyFitnessPal, Xero, Amazon Music, Prime Video, Clash of Clans, Wordle, Coinbase, Canva, AFP, HMRC, Vodafone, PlayStation, Pokémon Go...
Клиентите на големите банки исто така имаат проблеми бидејќи Llyds Bank, Halifax и Bank of Scotland во моментов не работат.
Во јули минатата година, глобален ИТ дефект предизвика откажување на летови низ целиот свет и го наруши работењето на бројни индустрии, вклучувајќи банки, здравствени установи, медиумски куќи и хотелски синџири.
Прекинот ги прекина интернет услугите, зафаќајќи околу 8,5 милиони уреди што работат со оперативниот систем Microsoft Windows.
И сè започна со погрешно ажурирање на софтверот во американската компанија за сајбер безбедност - CrowdStrike.
Amazon Web Services е најголемиот светски снабдувач на услуги за cloud computing. Тој нуди низа услуги за интернет инфраструктура што им овозможуваат на компаниите да изнајмуваат компјутери и сервери за да ги извршуваат своите апликации и веб-страници.
Како такви, сите проблеми во AWS можат да имаат големо влијание врз поголемиот дел од остатокот од интернетот, предизвикувајќи веб-страниците кои можеби немаат очигледна врска со самиот Amazon да паднат.
