Пазарот на компјутерски компоненти во последните недели бележи нагло зголемување на цената на RAM меморијата, особено на DDR5 модулите, што ги изненади и купувачите и трговците на мало. Слична ситуација се случи и со графичките картички за време на периодот на „рударење“.
Цените во некои случаи се зголемија и до трипати во споредба со летоска, а причините главно се поврзани со глобалните прекини во производството и експлозивната побарувачка од секторите за вештачка интелигенција и сервери.
Според достапните податоци, комплет од 32 GB DDR5 што можеше да се купи за околу 130 долари во средината на годината сега чини до 440 долари, што во денари е 23.000.
Уште подрастичен скок е забележан за комплетите од 64 GB DDR5, чија цена се движеше околу 200 долари (10.470 ден), додека сега се продаваат по цени од 700 до 900 долари, или приближно од 36.650 до 47.125 денари.
Ако ги земеме предвид конфигурациите на поновите игрици, веројатно е дека е невозможно да се има конфигурација под 95.000 денари.
Причината за ова зголемување на цената, според аналитичарите, лежи првенствено во огромната побарувачка за меморија во центрите за податоци и центрите за вештачка интелигенција.
Големите технолошки компании купуваат огромни количини серверска меморија, што ја намалува достапноста на стандардни RAM модули за потрошувачкиот пазар.
Дополнителен проблем е фактот што производителите на мемориски чипови, како што се Samsung, SK Hynix и Micron, пренасочија дел од својот производствен капацитет кон попрофитабилни сегменти, како што е HBM меморијата наменета за AI акцелератори. Како резултат на тоа, понудата на класична DDR4 и DDR5 RAM е ограничена, што директно влијае на зголемувањето на цената.
DDR5 меморијата за лаптопи, која претходно можеше да се купи за околу 40 до 50 долари (2.100-2.600 ден), сега чини до 60 долари, или околу 3.150 ден во некои случаи.
Поголемите пакети, како што се комплетите DDR5 од 96 GB, бележат зголемување од околу 500 долари (26.200 ден) на повеќе од 720 долари, што е приближно 37.700 денари.
Експертите предупредуваат дека не се очекува цените наскоро да се смират и дека високите цени би можеле да продолжат во текот на првата половина од 2026 година.
За крајните корисници, ова значи дека изградбата или надградбата на компјутер, особено со 32 GB или повеќе RAM меморија, ќе биде сериозен финансиски трошок.
