Apple развива функции како што се испраќање слики преку сателит, но и преземање мапи кога нема мобилна мрежа.
Apple е заинтересиран за сателитски технологии повеќе од 10 години, а резултатот од таа амбиција го видовме во 2022 година, кога iPhone доби релативно примитивна, но многу корисна функција Emergency SOS. Сепак, гигантот од Купертино не планира да застане тука и веќе некое време развива неколку нови технологии што би го претвориле iPhone во сериозен уред за сателитска комуникација, тврди Марк Гурман од Bloomberg.
Според неговите сознанија, во компанијата имало дискусија за тоа дали Apple треба да нуди свои сателитски услуги, наместо да се потпира на партнери како Globalstar или SpaceX. Оваа идеја, сепак, официјално не се проширила, бидејќи дел од менаџментот смета дека „Apple не е телекомуникациски оператор и не треба да се однесува како таков“.
Сепак, Гурман наведува дека постојат голем број причини зошто Apple би можел да има корист од развивање на сопствена мрежа - првенствено поради поголема контрола врз корисничкото искуство и намалена зависност од други компании, особено ако сателитската комуникација стане стандард во иднина.
Тој исто така открива дека Apple моментално развива неколку проекти поврзани со сателитски технологии во iPhone уредите паралелно:
Рамка за апликации од трети страни - Apple развива API што ќе им овозможи на програмерите да додадат поддршка за сателитска поврзаност на своите апликации.
Сателитска навигација во Apple Maps - планирана е можност за навигација без мобилен сигнал или Wi-Fi конекција, без потреба од преземање мапи однапред.
Понапредно испраќање пораки - овозможување испраќање фотографии, а не само текст, преку сателит.
Подобрена поврзаност - целта е сателитската комуникација да работи дури и кога уредот е во автомобил, џеб или затворен простор, без да мора да се насочува директно кон небото.
5G NTN поддршка (Non-Terrestrial Networks) - ќе му овозможи на iPhone да користи сателитски мрежи како додаток на класичните мобилни мрежи.
Гурман не прецизираше во која фаза на развој се овие технологии, ниту кога ќе им станат достапни на корисниците, но нагласува дека Apple активно инвестира во сателитска инфраструктура, како и дека вселената е следниот голем чекор во еволуцијата на iPhone.
