Иако имаше шпекулации дека јужнокорејскиот гигант ќе го копира новитетот што го подготвува Apple, најновите извештаи откриваат дека тоа нема да се случи.
Уште во мај, се појавија гласини дека претстојниот Samsung Galaxy S27 Ultra би можело да добие главна камера од 200MP со променлив отвор на блендата. Овој потег изгледаше сигурен, со оглед на тоа што долго време се шпекулираше дека Apple планира да ја примени истата технологија на моделите iPhone 18 Pro и iPhone 18 Pro Max.
Сепак, најновиот извештај од Јужна Кореја открива дека Samsung донел конечна одлука - ниту еден од моделите во претстојната серија Galaxy S27 нема да има камера со променлив отвор на блендата.
Главните причини за оваа одлука лежат во зголемените трошоци за производство и естетиката на самиот уред. Променливата бленда бара посложен механизам што би го направил модулот на камерата на задната страна од телефонот значително подебел.
Компанијата процени дека практичните придобивки од оваа функција кај камерите на паметните телефони не се доволно големи за да ги оправдаат дополнителните трошоци, особено во време кога сите производители на паметни телефони веќе се соочуваат со значително зголемување на цената на DRAM меморијата.
За потсетување, ова не би била првата средба на Samsung со гореспоменатата технологија. Јужнокорејскиот гигант веќе ја користеше променливата бленда на моделите Galaxy S9 и Galaxy S10 во 2018 и 2019 година, но потоа го напушти концептот и го отфрли од следните генерации на водечки модели.
