Компанијата realme го претстави новиот паметен телефон P4 Power 5G, кој се издвојува по капацитетот на батеријата од 10.001 mAh.
Станува збор за модел од серијата P, наменет за корисници за кои автономијата е еден од клучните критериуми при избор на телефон.
Според производителот, батеријата користи технологија silicon carbon anode, а Realme истакнува дека уредот одржува дебелина на куќиштето од 9,08 mm и тежина од 219 грама, и покрај големиот капацитет.
Телефонот е дизајниран да работи во температурен опсег од -30 до 56 степени Целзиусови, а батеријата е тестирана за отпорност на притисок, падови и преполнување. P4 Power 5G доби TÜV сертификат.
Уредот поддржува брзо полнење од 80W, при што батеријата, според фабричките податоци, се полни до 50% за околу 36 минути. Исто така, поддржано е и обратно полнење од 27W, што овозможува телефонот да се користи како извор на енергија за други уреди.
Realme наведува дека батеријата задржува повеќе од 80% капацитет по до 1.650 циклуси на полнење.
Кога станува збор за хардвер, realme P4 Power 5G се напојува со чипсетот MediaTek Dimensity 7400 Ultra 5G. Телефонот е опремен со AMOLED екран со брзина на освежување од 144 Hz, максимална декларирана осветленост до 6.500 нити и поддршка за прикажување на 1,07 милијарди бои.
Во однос на дизајнот, уредот има заден дел кој е поделен на два дела - долен дел со мат завршница и горен дел со транспарентен сегмент преку кој се видливи внатрешните елементи.
Од додатоци и заштита, realme наведува IP66, IP68 и IP69 сертификати, заштита на екранот од Corning Gorilla Glass, надградени звучници со засилен излез и софтвер realme UI 7.0. Информациите за цената и достапноста на домашниот пазар засега не се објавени.