Новите регулативи на ЕУ ќе ги принудат производителите да произведуваат подолготрајни телефони со лесно заменливи батерии и достапни делови.
Европската Унија презеде чекор што засекогаш ќе го промени начинот на кој произведуваат мобилните. Новиот сет правила, кој се воведува во фази, ја става издржливоста и можноста за поправка во самата срж на дизајнот.
Главната порака е јасна: телефоните не треба да бидат стока што се фрла штом батеријата ќе се испразни.
Построгите стандарди веќе се на сила од јуни 2025 година, но вистинскиот бум нè очекува во 2027 година, кога секој паметен телефон ќе мора да има батерија што корисникот ќе може да ја замени дома.
Овие правила не се само препорака, туку строг мандат што ги обврзува брендовите како Apple, Samsung и Xiaomi да ги променат основите на своето работење. Еве што се менува:
- Самостојна замена на батериите: До 2027 година батериите мора да можат да се заменуваат со користење на основни, лесно достапни алатки.
- Батерии со подобар квалитет: Секоја батерија мора да задржи најмалку 80% капацитет по 800 циклуси на полнење.
- Резервни делови 10 години: Производителите мора да обезбедат делови една деценија по лансирањето на моделот.
- Брза испорака на делови: Клучните компоненти мора да стигнат до клиентот во рок од 5 до 10 работни дена.
- Јавни упатства: Прирачниците за поправка мора да бидат достапни за сите, а не само за овластени сервисери.
Иако ова се правила за европскиот пазар, тие речиси сигурно ќе станат глобален стандард. Премногу е скапо за производителите да произведуваат две различни верзии на хардвер, па затоа iPhone или Galaxy што се продаваат во Македонија или Америка веројатно ќе бидат истите што ги исполнуваат стандардите на ЕУ.
За корисниците, ова значи драстично пониски трошоци. Наместо да купуваат нов телефон за 1.000 евра затоа што му умира батеријата, ќе можат да му го продолжат животниот век за уште неколку години за многу помалку пари.
Можеби телефоните ќе станат за милиметар подебели, но за возврат ќе бидат посигурни и поеколошки.
