Апликацијата Google Maps е подобрена со интеграција на моделот Gemini AI. Асистентот со вештачка интелигенција на Google ќе го овозможи она што компанијата го нарекува „прво hands-free искуство со возење низ разговор“.
Според Google, возачот ќе се чувствува како „да има познавач на совозачкото седиште, кој сигурно може да му помогне да стигне таму каде што оди“.
Сепак, на чет-ботовите со вештачка интелигенција никогаш не им недостигала самодоверба, проблемот е колку е веродостојно она што го кажуваат. Во секој случај, корисникот може да го праша Gemini што сака додека користи Google Maps за навигација.
Дури и барањата во повеќе чекори би требало да работат добро. Gemini може да прави и други работи, како додавање настани во вашиот календар, односно во Google Calendar, па дури и да пријавува прекини во сообраќајот користејќи го вашиот глас. Оваа функција ќе биде достапна „во наредните недели“ на Android и iOS.
Интересно е што насоките за навигација исто така добиваат надградба базирана на Gemini и ќе користат обележја за насочување на корисниците, на пример, „свртете десно по ресторанот Калабалак“. Обележјата што ќе се користат исто така ќе бидат обележани на мапата како што корисникот се приближува до секоја од нив. Оваа функција сега е достапна за Android и iOS во САД.
Дури и ако возачот не користи навигација, Google Maps ќе го извести однапред за застои во сообраќајот, проактивно известувајќи го за прекини на патот пред него. Овие предупредувања сега се достапни во САД на Android.
Конечно, корисниците можат да ја допрат иконата на камерата во лентата за пребарување на Google Maps и да го држат телефонот исправено за да идентификуваат различни места, ресторани, кафулиња, продавници или познати знаменитости во областа. Кога корисниците ќе ги видат маркерите, можат да го допрат микрофонот за да постават прашања за секое место, „исто како што би прашале пријател“.
Корисниците ќе ги добијат одговорите што им се потребни благодарение на „моќната комбинација од можностите на Gemini и разбирањето на Google Maps за местата низ целиот свет“, соопшти компанијата. Новата функција Lens ќе биде „постепено“ достапна „подоцна овој месец“ во САД на Android и iOS.
