Иако цените на меморијата вртоглаво растат, корисниците на Windows 11 не го примија добро соопштението на Microsoft, кое сега е избришано.
Microsoft предизвика возбуда откако објави, а потоа и веднаш избриша текст во кој тврдеше дека 32 GB RAM меморија е новиот стандард за непречено работење на Windows 11 компјутерите.
Во спорната објава, која прв ја забележа порталот Windows Latest, компанијата експлицитно изјави дека 16GB меморија е само „почетна точка“ за гејмерите, додека 32GB е неопходно за безгрижни перформанси. Оваа препорака ги налути корисниците, особено затоа што минималните барања за Windows 11 сè уште се заглавени на застарените 4GB, додека голем број нови компјутери сè уште се продаваат со само 8GB.
Причините за овој „тивок“ притисок врз корисниците е начинот на кој Windows 11, игриците, Chromium, WebView2 и другите модерни апликации трошат ресурси:
„За повеќето гејмери, 16GB RAM меморија е практична почетна точка. Преместувањето на 32GB RAM меморија помага ако користите Discord, прелистувачи или алатки за стриминг покрај вашите игрици. Таа дополнителна меморија им дава и на поновите игрици повеќе простор за работа, бидејќи барањата за меморија продолжуваат да растат“, соопштија од Microsoft.
Интересно е што ова не е прв пат Microsoft да се обидува да промовира 32GB како „нова нормалност“, што се совпаѓа со нивниот агресивен поттик за вештачка интелигенција. Иако претходно се тврдеше дека Copilot+ компјутерите со 16GB меморија се на врвот на листата, новото соопштение сугерира дека дури и тоа повеќе не е доволно за сериозните корисници.
Откако социјалните медиуми се потресоа, Microsoft ја повлече објавата, ја избриша архивата и го пренасочи линкот кон почетната страница. Овој потег се чини дека е обид за контрола на штетата, додека извршниот директор Сатја Надела ветува дека компанијата работи на оптимизирање на системот за уреди со помалку меморија.
Иако документот исчезна, пораката што Microsoft се обидува да ја пренесе „под радарот“ е јасна. Во свет каде што софтверот станува сè побавен, а цените на меморијата вртоглаво растат, ограничувањето од 32 GB RAM полека престанува да се смета за луксуз и станува реалност за која ќе мора да платиме.
