Apple никогаш поевтин: Откриен MacBook Neo од 599 долари кој менува сè

Компанијата од Купертино го шокираше пазарот на лаптоп компјутери со најавата за новиот MacBook.

Американската технолошка компанија Apple го претстави компјутерот MacBook Neo по цена од 599 долари и со тоа директно ги предизвика производителите на Windows PC и лаптоп уреди Chromebook кои се продаваат по слични прифатливи цени.

Новиот модел е 400 долари поевтин од најпристапниот лаптоп од новата генерација од Apple и значително под цената на сегашниот MacBook Air компјутер, кој сега чини 1.099 долари.

Ова е значаен пресврт за Apple, кој со децении избегнуваше лансирање на евтини MacBook-и, објавува Bloomberg.

Благодарение на напредокот во процесорот на iPhone, компанијата успеа да ја намали цената без многу компромис во перформансите.

Уредот е направен од алуминиум и има 13-инчен екран, а го користи чипот A18 Pro на iPhone, што е прв пат Apple да вгради процесор за паметен телефон во MacBook.

Основниот модел има 256GB простор за складирање, додека верзијата од 699 долари нуди 512GB и вклучува биометриска автентикација (Touch ID).

MacBook Neo нуди до 16 часа траење на батеријата, осветленост на екранот до 500 нити и осум гигабајти RAM меморија.

Уредот работи на истиот оперативен систем (macOS) како и другите MacBook компјутери и е доволно моќен за секојдневни задачи како што се прелистување на веб, обработка на текст, видеоповици и основно уредување фотографии.

Новиот MacBook Neo е достапен во цитрусно жолта, сребрена, индиго и светло розова боја, што значи дека компанијата цели на студенти и пошироката јавност.