Астрономите следат објект што се движи кон нас, а кој би можел да доаѓа од друг ѕвезден систем, објави AP. Научниците открија нешто што би можело да биде само третиот познат меѓуѕвезден објект што поминува низ нашиот Сончев Систем, соопшти синоќа Европската вселенска агенција (ЕСА).
Безопасниот објект моментално е во близина на Јупитер, стотици милиони километри од Земјата, и се движи кон Марс, но според научниците не би требало да се приближи повеќе од тоа до Сонцето.
Сè уште е прерано да се утврди дали објектот – моментално означен како A11pl3Z – е карпест астероид или ледена комета, или каква е неговата големина и облик. Потребни се дополнителни набљудувања за да се потврди неговото потекло. НАСА соопшти дека внимателно ја следи ситуацијата.
Астрономот Жузеп Триго-Родригес од Институтот за астрофизика во близина на Барселона, Шпанија, верува дека станува збор за меѓуѕвезден објект врз основа на неговата необична траекторија и екстремна брзина додека се движи низ Сончевиот Систем. Тој проценува дека има дијаметар од приближно 40 километри.
Првиот потврден меѓуѕвезден посетител беше во 2017 година. Именуван е Оумуамуа, што на хавајски значи „извидник“, во чест на опсерваторијата на Хаваи што го откри. Првично беше класифициран како астероид, но поради подоцнежните карактеристики беше прекласифициран во комета, иако неговата издолжена форма продолжува да ги збунува научниците.
Вториот познат објект за кој е потврдено дека доаѓа од друг ѕвезден систем е 21/Борисов, откриен во 2019 година и речиси сигурно е комета.
