Американската компанија за вселенска технологија Blue Origin, во сопственост на основачот на Amazon, Џеф Безос, објави дека ќе ги суспендира летовите за вселенски туризам најмалку две години за да се фокусира на целта за враќање на астронаутите на Месечината.
Blue Origin денеска соопшти дека ќе ги паузира летовите на ракетите New Shepard и „ќе ги пренамени ресурсите за дополнително да го забрза развојот на можноста за испраќање луѓе на Месечината“, се вели во соопштението на компанијата.
„Одлуката ја одразува посветеноста на Blue Origin кон националната цел за враќање на Месечината и воспоставување трајно и одржливо присуство на Месечината“, се додава во соопштението.
Blue Origin е вклучена во програмата Artemis на НАСА, која има за цел да ги врати астронаутите на Месечината за прв пат по повеќе од 50 години, како основа за идните мисии на Марс.
Компанијата нуди кратки вселенски патувања за туристите од 2021 година, а Безос учествуваше во првиот лет со екипаж.
Blue Origin соопшти дека вкупно 98 луѓе биле во вселената на 38 летови, вклучувајќи ја пејачката Кети Пери и актерот Вилијам Шатнер.
Вселенскиот туризам за богатите е критикуван уште од самиот почеток поради неговите ограничени научни придобивки, негативното влијание врз животната средина и климата и неговата елитистичка природа.
Blue Origin официјално не ја објави цената на патувањето, но проценките сугерираат дека е во опсег од стотици илјади долари.
