DJI го претстави новиот дрон Mavic 4 Pro, кој, меѓу другото, има подобри камери, поголем дострел и издржливост. Подобар е од својот претходник во секој сегмент, а има и уникатен трик, 360° Infinity Gimbal.
Gimbal може да ротира цели 360 степени за „холандски агли“ и вертикални снимки, а може да се навали и 70 степени нагоре за драматични снимки. Овој Gimbal носи 3 камери, широкогледна, средна телефото и долга телефото камера. Главната камерата Hasselblad од 100 MP со голем сензор Four Thirds и широкоаголен објектив од 28 мм (претходно сензор од 20 MP), а овој модул има прилагодлива бленда од f/2.0 до f/11.
Средната телефото камера е од 48 MP (1/1,3 инчи) со објектив од 70 мм, а тука е и долг телефото модул со сензор од 50 MP 1/1,5 и објектив од 168 мм (f/2,8), што е значително подобрување во однос на модулот од 12 MP 1/2 инчи на 3 Pro.
Трите камери ветуваат конзистентна репродукција на боите, така што можат лесно да се заменат. Сите три поддржуваат 10-битни D-Log, D-Log M и HLG профили на бои. Можно е да се добие HDR видео од 4K/60 fps со најмалку 13 чекори динамички опсег од која било камера.
Главната Hasselblad камера може да достигне до 6K/60 fps и има динамички опсег до 16 чекори. За снимки со забавено движење, главната и средната телефото камера имаат 4K/120 fps, додека долгата телефото камера оди до 4K/100 fps.
DJI Mavic 4 Pro има батерија од 95 Wh, што нуди поголема моќност. Дронот може да лета до 51 минута и да достигне максимална брзина од 90 км/ч. За споредба, Mavic 3 Pro може да лета до 43 минути.
Подобрениот систем за пренос DJI 04+ му овозможува на дронот да лета на растојанија до 41 километар. Ако корисникот се држи до опсег од 30 километри, ќе има 10-битен HDR видео пренос.
Новиот модел има и 6 камери „рибешко око“ со можност за работа во услови на лошо осветлување, како и процесори за навигација и избегнување на судири. Ова овозможува избегнување на пречки во сите правци со брзина до 65 км/ч во услови на слаба осветленост. Кога осветлувањето е добро, дронот ќе ја мапира околината и може да се врати на почетната точка дури и без GPS прием. Системот ActiveTrack 360° може да ги следи објектите дури и ако се делумно затемнети, а може да детектира и следи возила од оддалеченост до 200 метри.
DJI го претстави и новиот далечински управувач DJI RC Pro 2. Има 7-инчен мини-LED екран и 128 GB внатрешна меморија, додека батеријата му трае 4 часа. Корисникот може да снима звук користејќи го вградениот микрофон или со спарување на DJI Mic.
Дополнително, Mavic 4 Pro може да се користи со паралелен центар за полнење, кој може да полни до 3 батерии одеднаш, испраќајќи повеќе енергија до најмалку наполнетата батерија, а откако ќе се изедначат, ги полни подеднакво. Една батерија може да се полни за 50 минути, а сите три за 90 минути.
Овој центар има и неколку паметни трикови. Можно е да се земе енергијата од наполнета батерија и да се дистрибуира на батерии што треба да се полнат. Може да се користи и како батерија од 100 W за полнење мобилни телефони и лаптопи.
Функцијата QuickTransfer ви овозможува да ја користите апликацијата DJI Fly за да преземате видео од дронот со брзина до 80 MP/s користејќи Wi-Fi 6. Ова може да се направи додека дронот е во торбата. Исто така, можно е да се користи USB-C кабел за побрз жичен пренос.
DJI Mavic 4 Pro е достапен во Европа. Основниот пакет вклучува дрон со 64 GB меморија, батерија и основен далечински управувач DJI RC 2 и чини 2.100 евра.
Пакетот Fly More Combo вклучува уште две батерии, полнач од 100 W USB-C, центар за полнење и торба во која може да се спакува сè, а цената е 2.700 евра.
Creator Combo вклучува дрон со 512 GB меморија, новиот далечински управувач DJI RC Pro 2, полнач од 240W и USB C-to-C кабел, а овој пакет чини 3.540 евра.
