Новите Android телефони и други слични уреди наскоро ќе добијат значително зголемување на перформансите. Google објави детално објаснување за тоа како ќе се постигне ова.
Тимот на Google за Android LLVM алатки објави воведување на функција наречена Automatic Feedback-Directed Optimization (AutoFDO) во самото јадро (kernel) на Android, што може да донесе голем скок во перформансите на системот.
AutoFDO, кој првпат беше воведен во Android 12 (2021), е техника за оптимизација базирана на земање примероци. Користи податоци за извршување од реалниот свет, собрани директно од хардверските монитори, за да ги води одлуките на компајлерот. На овој начин, статичката анализа се заменува со профили што ја одразуваат вистинската употреба на уредот. Оваа функција е слична на технологијата PGO (Profile Guided Optimization) што веќе се користи во Windows и Linux, како и во апликациите базирани на Chromium на Google.
Според Google, овој пристап му овозможува на компајлерот полесно да ги идентификува „жешките“ (hot) патеки на кодот - оние што најчесто се извршуваат - и соодветно да ги оптимизира. Овие профили се создаваат под контролирани лабораториски услови со извршување на репрезентативни работни оптоварувања, вклучувајќи ги и 100-те најпопуларни апликации. Наједноставно кажано, принципот е донекаде сличен на тоа како функционира кеширањето на податоци.
Google наведува дека нивното истражување покажува просечно зголемување на перформансите од 10,5 проценти. Со оглед на тоа што јадрото на Android зафаќа околу 40% од вкупното време на процесорот (CPU), резултатите се опипливи: 4% побрзо стартување на апликациите „од нула“ (cold launch) и 1% побрзо време на стартување.
Иако овие проценти не изгледаат огромни на хартија, Google тврди дека овие оптимизации се одлични за целокупното корисничко искуство бидејќи се преведуваат во побрзо префрлување помеѓу апликациите, пофлуиден интерфејс и подолго траење на батеријата.
Функцијата моментално е насочена кон верзиите на јадрото android16-6.12 и android15-6.6, а податоците се собирани на Pixel уреди. Google планира да ја прошири поддршката за поновите верзии на Generic Kernel Images (GKI) и други архитектури, покрај тековната aarch64.
Со усвојување на стратегија која е „конзервативна по дифолт“, Google истакнува дека се обидува да осигури дека AutoFDO ја зголемува брзината без да ја загрози сигурноста на самиот систем.
