Кина планира да удри астероид со ракета што ќе биде 26 пати побрза од брзината на звукот

Според истражувачите, планираната кинеска мисија оди чекор подалеку од демонстрацијата DART на НАСА, обидувајќи се со пореално сценарио за планетарна одбрана.

Наместо едноставно да ја менува орбитата на еден астероид околу друг, мисијата е дизајнирана директно да ја промени патеката на астероидот во однос на Земјата.

Истражувачите исто така рекоа дека доколку е потребно, ударот би можел да ја наруши или дури и да ја распадне структурата на астероидот.

Проектот го води Ли Мингтао, главен научник за планетарна одбрана во Кинеската национална вселенска администрација, и има за цел да ги унапреди технологиите што еден ден би можелo да помогнат во заштитата на Земјата од опасни објекти.

Планираниот вселенски брод ќе ја погоди целта со брзина од повеќе од 9 километри во секунда, значително побрзо од вселенскиот брод DART на НАСА, кој ја погоди својата цел со брзина од 6,1 километар во секунда.

Според научниот труд, средбата би можела да се случи за време на блиското поминување на астероидот покрај Земјата во 2029 или 2030 година, кога се очекува да помине на растојание од приближно 6,92 милиони километри од нашата планета.

Брзината на ударот би одговарала на брзина од повеќе од 26 маха на ниво на морето.

Покрај самиот удар, мисијата ќе вклучува и второ вселенско летало дизајнирано да го набљудува астероидот пред, за време и по судирот. Сондата ќе ги следи промените во орбитата, обликот и површината на астероидот, а истовремено ќе ја проучува и неговата внатрешна структура.

За разлика од мисијата Hera на Европската вселенска агенција, која беше лансирана одделно за да ги проучи последиците од DART тестот на НАСА, Кина планира да го вклучи ударното летало и вселенското летало за набљудување во истата мисија.

Истражувачите од Кинеската национална вселенска администрација и Кинеската академија на науките рекоа дека овој пристап е дизајниран за поблиску да симулира сценарио за планетарна одбрана во реалниот свет со директно менување на патеката на астероидот во однос на Земјата, објавува South China Morning Post.

Претстојната мисија за удар на астероид ќе се фокусира на четири клучни цели: прецизно удирање во целта, успешно менување на нејзината орбита, прецизно мерење на резултатите од ударот и потврдување дека Земјата останала безбедна по тестот.