Microsoft планира значително да ги подобри перформансите на оперативниот систем Windows 11, а сè ќе им биде достапно на корисниците на крајот од годината преку новата верзија 25H2.
Компанијата изјави дека корисничкото искуство ќе биде во фокусот на претстојната верзија, со посебен акцент на решавање на проблемите со бавното работење на системот. Инженерите од Редмонд веќе тестираат нова функција која автоматски ги детектира моментите кога системот „се заглавува“, собира технички информации и ги зачувува во позадина - без да влијае на работата на компјутерот. Тие податоци можат да се препратат до Microsoft преку Feedback Hub, што значително го забрзува дебагирањето.
Покрај тоа, новата верзија носи подобрувања и кога станува збор за драјверите - сите тие ќе мора да поминат построга проверка пред да добијат сертификат. Ова, како што наведува компанијата, ја намалува можноста лошиот софтвер да влијае на брзината и стабилноста на системот.
Друга важна промена е начинот на кој ќе се инсталира ажурирањето 25H2 - ќе се третира како кумулативно ажурирање, слично на редовните месечни ажурирања. Ова значи дека преминот кон нова верзија ќе трае помалку време, со помалку прекини.
Исто така, се очекуваат бројни помали прилагодувања во самиот систем - меѓу нив оптимизации за File Explorer, Taskbar, но и управување со потрошувачката на енергија кога корисникот не е активен.
Потсетуваме дека Microsoft претходно беше критикуван за намалените перформанси на Windows 11 во споредба со претходната верзија, особено на постарите компјутери. Овие најавени подобрувања се дел од обидот на компанијата да ја врати довербата на корисниците и да обезбеди Windows да остане конкурентен во сè побавно дигитално опкружување.
Верзијата 25H2 се очекува на крајот на 2025 година, а моментално е достапна за членовите на програмата Windows Insider.
