Microsoft призна дека можеби никогаш нема да може целосно да ја реши една од најчестите грешки во системот Windows Update, позната како 0x80070643.
Грешката најчесто се јавува при обид за инсталирање на ажурирања на Windows Recovery Environment (WinRE), дури и на компјутери што ги исполнуваат сите технички барања, вклучително и доволно слободен простор на дискот.
Иако во април беше објавено ажурирање кое требаше да го реши овој проблем, корисниците продолжија да пријавуваат идентични проблеми. Microsoft во тоа време изјави дека системот едноставно ќе престане да нуди ажурирања за корисниците погодени од грешката - што многумина го протолкуваа како откажување од решавање на проблемот.
Како дел од јулскиот пакет за закрпи „Patch Tuesday“, Microsoft објави ново ажурирање под кодот KB5063523, кое е наменето за подобрување на функционалноста на WinRE. Сепак, и покрај тоа што се тврди дека грешката е „поправена“, таа сè уште се појавува во историјата на ажурирања на голем број корисници.
Документацијата на Microsoft јасно наведува:
„Грешката 0x80070643 е потврдена, но сепак може да се прикаже како порака, иако всушност не ја одразува вистинската состојба на системот“.
Со други зборови, станува збор за визуелен баг - корисникот добива известување за неуспешно ажурирање, иако технички е успешно применето.
Поради природата на проблемот и начинот на кој Windows ги следи ажурирањата, Microsoft сега отворено признава дека можеби никогаш нема да може целосно да го отстрани овој баг од корисничкото искуство.
Иако функционалноста на системот не е доведена во прашање, корисниците и ИТ администраторите сепак се збунети - особено оние кои се потпираат на дневникот за ажурирања како мерка за безбедност и стабилност.
Microsoft советува најновите ажурирања да се инсталираат редовно, а грешката 0x80070643 - ако се појави - да се игнорира, ако системот функционира нормално.
