Според најновите истражувања, мачките развиваат деменција на сличен начин како и луѓето, што отвора нови можности за развој на терапии.
Имено, експерти од Универзитетот во Единбург анализирале мозоци на мачки кои покажувале знаци на деменција, како што се конфузија, нарушувања на спиењето и зголемено мјаукање.
Наслаги од амилоид-бета протеин, супстанца што се акумулира во мозоците на луѓето кои страдаат од Алцхајмерова болест, биле пронајдени во мозоците на мачките. Покрај тоа, научниците го нарекоа ова откритие „совршен природен модел за Алцхајмерова болест“, пишува The Independent.
Анализите покажаа акумулација на токсичен протеин во синапсите, врските што овозможуваат комуникација помеѓу мозочните клетки. Губењето на синапсите е поврзано со пад на меморијата и когнитивните способности.
Откриено е дека потпорните клетки почнуваат да ги „напаѓаат“ оштетените клетки. Овој процес е нормален во развојот на мозокот, но во староста може да го забрза влошувањето на мозочните функции.
Овие резултати би можеле да помогнат во развојот на поефикасни терапии за Алцхајмерова болест, како и да го подобрат третманот на деменцијата кај мачките.
Д-р Роберт МекГихан, водечки истражувач, изјави: „Деменцијата е катастрофална болест - без разлика дали ги погодува луѓето, мачките или кучињата. Нашите наоди покажуваат сличности помеѓу мачкината деменција и Алцхајмеровата болест кај луѓето. Бидејќи мачките природно ги развиваат овие промени, тие можат да понудат посигурен модел на болеста отколку лабораториските животни, што е корисно и за луѓето и за домашните миленици.“
