Метанот, гас што ја задржува топлината и предизвикува ефект на стаклена градина, е веројатно најпознат по своите опасности за луѓето и атмосферата на Земјата. Но, во темните длабочини на океанот, тој е хранлив оброк за некои од најмистериозните суштества во светот.
Научниците тврдат дека откриле три претходно непознати видови пајаци покрај западниот брег на Соединетите Американски Држави. Овие видови се хранат со метан кој се влева илјадници метри под површината на морето.
Според студијата, објавена во списанието „Proceedings of the National Academy of Sciences“, бактерии се наоѓаат во егзоскелетот на овие пајаци, додека микробите за возврат го претвораат метанот и кислородот богати со јаглерод во шеќери што пајаците можат да ги јадат.
„Исто како што би јаделе јајца за појадок, морските пајаци ја стружат површината на своите тела и ги јадат сите овие бактерии за исхрана“, вели Шана Гофриди, водечки истражувач во студијата и професор по биологија на Колеџот „Оксидентал“ во Лос Анџелес.
Таа нагласи дека овој начин на исхрана никогаш порано не е забележан кај морските пајаци. Всушност, како што објасни Гофриди, другите видови морски пајаци имаат повеќе заедничко со своите копнени роднини, користејќи големи цевчести заби за да фатат, онеспособат и цицаат течности од мек плен, како што се медузите.
Сепак, на новооткриените видови морски пајаци им недостасува она што им е потребно за да фатат плен, па затоа се хранат со метан од сопствените тела. Гофриди истакна дека е можно овие пајаци да играат клучна улога во спречувањето на метанот да стигне до Земјината атмосфера.
Треба да се запомни дека метанот е една од причините за глобалното затоплување, пишува CNN.
