Иднината на системите за спречување на возење под дејство на алкохол можеби нема да биде уред во автомобил во кој возачот мора да дувне. Наместо тоа, таа улога би можела да ја преземе паметен часовник или нараквица што ќе следи дали има алкохол во телото и би можела да спречи автомобилот да се запали.
Ваквите уреди се веќе во фаза на развој и тестирање. Пример е BACtrack Skyn, нараквица која не го мери алкохолот од здивот, туку ги следи трагите од алкохол излачувани преку кожата и врз основа на тоа ја проценува концентрацијата на алкохол во крвта.
Засега, овој уред служи како предупредување за возачите, но долгорочната цел е нараквицатада се поврзе со автомобилот, така што, во случај да открие алкохол во телото на возачот, ќе спречи возилото да се запали.
Секако, останува прашањето колку би бил корисен таков уред за оние што намерно сакаат да возат под дејство на алкохол. Сепак, би можел да биде корисен за возачите што не се сигурни кога е безбедно повторно да седнат зад воланот по ноќно излегување.
Технологијата привлекува сè поголемо внимание бидејќи возењето под дејство на алкохол останува една од најголемите причини за сообраќајни несреќи.
Според прелиминарните податоци од Европската комисија, околу 19.400 луѓе загинале на патиштата на Европската Унија во 2025 година, а повеќето земји-членки не се на добар пат до 2030 година да го преполоват бројот на смртни случаи и сериозни повреди во сообраќајни несреќи.
Европскиот совет за безбедност на патиштата проценува дека околу една четвртина од сите смртни случаи на патиштата во ЕУ се поврзани со алкохол. Затоа ЕУ веќе го подготви теренот за алкохолни „блокади“. Од јули 2024 година сите нови автомобили хомологирани во Европската Унија мора да бидат технички подготвени за вградување на систем за алкотест (alcolock).
Доколку технологијата стане доволно прецизна и сигурна, паметна нараквица или часовник би можел да се поврзе со автомобилот и автоматски да го спречи стартувањето на моторот кога ќе открие присуство на алкохол во телото на возачот.
Таквото решение би можело да биде особено интересно за возачите што претходно биле казнети за возење под дејство на алкохол или за возни паркови на компании каде што работодавците сакаат дополнително да ја зголемат безбедноста.
Засега, оваа технологија сè уште не е подготвена за масовна примена, но веќе не припаѓа на научната фантастика. На почетокот би можела да послужи како предупредување за возачот дека сè уште има алкохол во системот и дека не е безбедно да седи зад воланот, додека подоцна би можело да добие можност целосно да го спречува стартувањето на автомобилот.
