Сателитските снимки на НАСА открија нов остров покрај брегот на Алјаска, кој се појави откако долгогодишниот глечерски мраз се стопи, изолирајќи мала планина која некогаш беше дел од копното.
Островот се наоѓа во езерото Алсек, каде што глечерот Алсек се намалува и го поплавува регионот со вода од топењето на мразот. Две сателитски снимки од Landsat, направени на 5 јули 1984 година, од камерата TM (Thematic Mapper) на Landsat, и на 5 и 6 август 2025 од камерата OLI-2 (Operational Land Imager-2) на Landsat 9, ја покажуваат трансформацијата со зачудувачки детали, соопшти НАСА.
Глечерот Алсек некогаш се обвиткуваше околу мала планина позната како Проу Ноб. Во текот на изминатите четири децении, двата крака на глечерот се повлекле повеќе од 5 километри, создавајќи проглацијално езеро. Неодамнешните слики потврдуваат дека глечерот сега е целосно одвоен од Проу Ноб, кој е опкружен со вода и официјално е остров, се вели во соопштението.
Глечеролозите со децении го следат глечерот Алсек. На почетокот на ХХ век се верувало дека глечерот завршува кај Гејтвеј Ноб, околу 5 километри западно од Проу Ноб, на спротивната страна од денешното езеро Алсек. Оттогаш, глечерот продолжил со своето постепено повлекување, а сателитските податоци ја следеле неговата трансформација.
Повлекувањето на глечерите го поттикна масовното ширење на езерото. Езерото Алсек порасна од околу 45 квадратни километри во 1984 година на околу 75 квадратни километри денес. Растот не се „храни“ само од стопената вода од глечерот Алсек, туку и од блиските проглацијални езера како што се Харлекин и Гранд Плато. Всушност, глечерот Алсек остана поврзан со северниот крак на глечерот Гранд Плато до околу 1999 година, кога обете ледени маси дополнително се повлекоа, создавајќи ја главната гранка на езерото Алсек што е видлива на подоцнежните сателитски снимки.
Новиот остров има површина од околу 5 квадратни километри. Врз основа на сателитските снимки, научниците веруваат дека се формирал некаде помеѓу 13 јули и 6 август годинава. Со распаѓањето на Проу Ноб, глечерот сега е помалку стабилен и повеќе склонен кон распаѓање, кога големи парчиња мраз се откинуваат во езерото.
Појавата на островот го одразува забрзаното темпо на повлекување на глечерите во Југоисточна Алјаска и неговата способност да ги преобликува пејзажите во рок од неколку децении. Проширувањето на езерата, нестабилните ледени фронтови и новооткриениот терен укажуваат на значителни промени во тек, а истражувачите предупредуваат дека континуираното губење на мразот во светот што се затоплува би можело да ја промени хидрологијата и екосистемите во регионот.
