Дел од историјата на Apple повторно оди на аукција: Apple I компјутерот со прекар Hatfield, кој беше продаден за 671.400 долари во 2013 година, есенва поворно ќе биде понуден на продажба.
Овој пат, аукциската куќа Bonhams очекува да се продаде за цена помеѓу 500.000 и 800.000 долари, а овој Apple I го доби прекарот по неговиот оригинален сопственик, Фред Хатфилд, кој го купил во текот на првата година од постоењето на Apple.
Машината, која сè уште е во употреба денес, е наведена како број 48 во регистарот на Apple I. Се проценува дека денес постојат помалку од 75 Apple I компјутери, а уште помалку се во употреба. Матичната плоча го носи потписот на коосновачот на Apple, Стив Вознијак, кој го дизајнираше компјутерот.
Тешко е да се смета Apple I за производ погоден за потрошувачите според денешните стандарди. На крајот на краиштата, купувачите мораа да обезбедат сопствено напојување, тастатура и монитор. Има само 4 KB RAM меморија.
Во средината на 1970-тите, компјутерот, кој доаѓаше со целосно склопена матична плоча и вграден видео излез, беше лесен за користење колку што можеше да биде еден компјутер. Беа произведени само околу 200 Apple I компјутери.
Денес, Apple I е повеќе ценет поради неговото историско значење и реткост отколку поради неговиот статус на производ што го менува светот. Дури со Apple II компанијата навистина направи чекор подалеку од пазарот на хобисти и стана брендот што е денес.
Заедно со потпишаниот Apple I, богатиот купувач ќе добие писмо потпишано од Стив Џобс. Освен што е вреден колекционерски предмет сам по себе, писмото покажува дека Џобс лично се справувал барем со дел од поддршката на клиентите на компанијата во текот на 1970-тите.
Хетфилд го контактирал Apple за да се пожали на недостатокот на софтвер за компјутерот од првата генерација. Во писмо од 1978 година, Џобс одговорил со понуда да го замени.
„Ова писмо е за да се потврди нашиот разговор од 16 јануари. Вие сте овластени да му го испратите на Apple Computer Inc. вашиот Apple I (без меморија) и чек од 400 долари, а за возврат ќе ви биде испратена матична плоча Apple II 4K. Со нетрпение го очекуваме вашиот брз одговор“, напишал Џобс.
Хетфилд ја одбил понудата и подоцна го продал Apple I на колекционер за 40.000 долари. Тоа е само дел од неговата моментална вредност.
Bonhams планира да го изложи Apple I на турнеја пред аукцијата на 14 октомври. Аукциската куќа ќе го претстави во Лос Анџелес од 9 до 11 септември, во Бостон од 21 до 23 септември, во Сан Франциско од 30 септември до 1 октомври, а потоа во Њујорк за време на аукцијата во октомври.
