Американскиот претседател Доналд Трамп пронајде нова „цел“ и ги замолува своите помошници да истражат наводна употреба на т.н. автописалка (autopen) за време на последните денови од мандатот на неговиот претходник Џо Бајден.
Како што напиша на својата социјална мрежа Truth Social, наводната употреба на автописалка од страна на Бајден е „најголемиот политички скандал во историјата на САД“.
Според американскиот претседател, превентивните помилувања на Бајден што ги издаде на крајот од неговиот мандат биле „нелегални“ бидејќи користел автописалка, иако го игнорираше фактот дека оваа машина се користи уште од ХIХ век.
Автописалка, исто така наречена роботизирано пенкало, е машина што го автоматизира потписот на лицето со помош на пенкало или друг инструмент за пишување, за разлика од скениран потпис, што е дигитална слика од потписот.
Оваа машина може да го реплицира потписот на лицето на широк спектар на писма, сертификати, дипломи и други документи.
Една таква машина, наречена Ghostwriter, користи паметна картичка или USB флеш-уред за складирање на потписи и фрази што можат да се реплицираат на хартија.
Ghostwriter може да користи секаков вид инструмент за пишување, од хемиско пенкало до боичка, и може да пишува на различни материјали со различна дебелина.
Една веб-страница што продава уреди за автопен наведува дека висококвалитетните машини што ги користат владините агенции можат да чинат помеѓу 5.000 и 20.000 долари по парче.
Интересно е да се напомене дека оваа машина прв пат пристигна во Овалната соба на почетокот на XIX век, и тоа дури откако беше патентирана.
Претседателот Томас Џеферсон, неколку месеци откако машината прв пат се појави на пазарот во 1803 година, купи автописалка и ја донесе во Белата куќа.
Оттогаш, бројни претседатели ја користеа автописалката за време на нивните мандати, а еден од нив, Линдон Б. Џонсон, дури им дозволи на медиумите да ја фотографираат машината, што стана фокус на статија во списанието The National Enquirer наречена „Роботот што седи за претседателот“.
Покрај Џонсон, автописалка користеа и Џералд Форд, а и самиот Трамп, кој неодамна го призна тоа, иако рече дека го користел роботот за „неважни документи“.
Исто така, вреди да се напомене дека во 2005 година Џорџ В. Буш го праша Министерството за правда на САД дали е во согласност со Уставот на САД да се користи автописалка.
Доби одговор дека „претседателот не мора рачно да потпише предлог за текстот да стане закон“.
Сепак, и покрај ова мислење на Министерството за правда, Трамп одлучи да покрене истрага за употребата на автописалката од страна на Бајден, со надеж дека ќе успее да ги „поништи“ помилувањата што неговиот претходник им ги додели на политичките противници на Трамп.
