Трамп призна дека користи AI, ама не кажува за кои цели

Доналд Трамп изјави дека користи вештачка интелигенција (ВИ/AI), иако не е подготвен да објасни за какви цели. Ова признание дојде во истата недела кога една водечка личност од технолошкиот сектор изрази нова загриженост за тоа во која насока би можела да се движи оваа технологија.

Во разговор со новинарите во авионот Air Force One на 13 септември, претседателот потврди дека лично се потпира на оваа технологија, истакнувајќи дека таа има примена „за многу работи“. На директното прашање како ја користи, тој одговори кратко: „Па, не сакам да ви го кажам тоа“.

Прашањето се појави откако новинарите сугерираа дека Доналд Трамп ги минимизира потенцијалните негативни страни на вештачката интелигенција. Тој целосно го отфрли таквото толкување, тврдејќи дека придобивките се далеку поголеми од какви било ризици. 

„Ќе има повеќе добро отколку лошо, и тоа во голема мера“, им рече тој на новинарите, додавајќи: „И тоа го велам уште од почетокот. Оној што ќе победи во трката за вештачка интелигенција – а ние водиме убедливо – тој победува“.

Еден ден подоцна, Трамп дополнително го образложи својот став во објава на Truth Social, инсистирајќи дека земјата нема потреба да стравува од брзиот развој бидејќи веќе постојат соодветни заштитни механизми, а тоа е – тој самиот. 

„Единствената контрола или 'заштитни огради' што ѝ се потребни на вештачката интелигенција се СИЛЕН И ПАМЕТЕН (со висок коефициент на интелигенција!) ПРЕТСЕДАТЕЛ, а САД го имаат тоа во изобилство!“, напиша тој.

Потоа го издвои коосновачот на компанијата Anthropic, Дарио Амодеи, тврдејќи дека неговата администрација ги скротила личностите од секторот за вештачка интелигенција кои правеле „лоши или потенцијално лоши 'работи', како Дарио (од Anthropic!), кој сега се преправа дека е 'совршено мало ангелче'“.

Амодеи, кој ја основаше Anthropic заедно со сестра му во 2021 година, постојано изразува загриженост поради неконтролираниот раст во овој сектор. Во неодамнешна објава на блог, тој ја опиша технологијата како потенцијално еден од големите продори на човештвото доколку се управува со неа одговорно, но предупреди на опасноста од губење на надзорот врз овие системи.

Неговата загриженост се појави и во време кога се известуваше за инцидент поврзан со сајбер-безбедноста во компанијата OpenAI, при што системите со вештачка интелигенција успеале да изведат напади врз надворешни мрежи за време на тестирањето. Овој случај беше наведен од застапниците за безбедност на вештачката интелигенција како доказ за потенцијалните ризици што ги носат системите со сè поголема автономија.

Трамп, од своја страна, на Truth Social тврдеше дека Вашингтон веќе има значителна „КРИВИЧНА и РЕГУЛАТОРНА моќ“ над технолошките компании. Тој тврдеше дека дополнителни заштитни механизми за вештачката интелигенција се непотребни и го повтори своето уверување дека Соединетите Американски Држави ја предводат глобалната трка во областа на вештачката интелигенција.

Коментарите на Трамп за вештачката интелигенција следат по предупредувањата од двајца истражувачи од американската компанија Anthropic дека брзиот развој на вештачката интелигенција би можело да доведе до изумирање на човечкиот род во не толку далечна иднина; по овие предупредувања, некои извршни директори на компании за вештачка интелигенција почнаа да се залагаат за забавување на развојот на оваа технологија. 

Тројца од најистакнатите лидери во индустријата за вештачка интелигенција – Амодеи, извршниот директор на OpenAI, Сем Алтман, и основачот на xAI, Илон Маск – ја поддржаа иницијативата за забавување на темпото со кое индустријата ги унапредува способностите на моделите за вештачка интелигенција.