Менопаузата е природен дел од животот, но преодниот период што му претходи - перименопауза - може да биде многу исцрпувачки.
Хормоналните промени предизвикуваат голем број на непријатни симптоми како што се топли бранови, промени во расположението и сувост на вагината. Како што телото минува низ овие прилагодувања, многу жени забележуваат промени во нивниот менструален циклус, кој може да вклучува пократки, полесни и неправилни циклуси. Сепак, лекарите предупредуваат дека постои симптом кој не треба да се сфаќа несериозно - и кој, за жал, е многу чест.
Околу 35 проценти од жените во перименопауза доживуваат долгорочно, исклучително тешко крварење познато како менопаузално крварење во налети. Тоа е ненадејно, обилно крварење кое може да трае со денови или недели и често доаѓа без предупредување.
„Крварењето во менопаузата се дефинира како крварење толку силно што хигиенската влошка мора да се менува на секои два часа, неколку пати по ред“, објаснува гинекологот д-р Нанет Санторо.
Гинекологот д-р Кери Краус додава: „Крварењето може да биде придружено со згрутчувања со големина на паричка и често предизвикува срам, непријатност и страв“.
Покрај обилно крварење, жените може да почувствуваат умор, вртоглавица или слабост, што може да укажува на анемија. Понекогаш е присутна и карлична болка, особено ако крварењето е предизвикано од фиброиди или аденомиоза.
„Крварењето може да трае со часови или недели, а циклусите може да варираат помеѓу месеци без менструација и ненадејно, обилно крварење“, вели д-р Краус.
Најчести причини се хормоналната нерамнотежа, особено вишокот естроген без доволно прогестерон, што го отежнува запирање на крварењето.
„Кога естрогенот е премногу висок или премногу низок долго време, слузницата на матката не се обновува правилно и крварењето не престанува“, предупредува д-р Санторо.
Доколку дојде до ваков тип на крвавење, лекарите силно советуваат што поскоро да се побара стручна помош.
„Жените не треба да страдаат во тишина“, заклучува д-р Санторо.
