Ако некогаш сте биле во ситуација кога, и покрај редовното вежбање и здравата исхрана, килограмите едноставно нема да се симнат, проблемот можеби е во нешто друго.
Кортизолот е главниот хормон на стрес кој го регулира шеќерот во крвта и метаболизмот. Кога сме во рамнотежа, ни помага да се справиме со стресот, но хронично покаченото ниво може да поттикне складирање на маснотии, особено во пределот на стомакот, да го зголеми апетитот и да го забави метаболизмот.
На краток рок, кортизолот е корисен бидејќи ни помага да се справиме со предизвиците. Проблемот се јавува кога нивото на кортизол останува покачено долго време, што може да предизвика зголемено складирање на маснотии, особено во пределот на стомакот, зголемен апетит и желба за слатка и масна храна. Кортизолот може да го забави метаболизмот, што значи дека телото согорува помалку калории. Исто така, предизвикува губење на мускулната маса, што дополнително го намалува трошењето на енергија, како и проблеми со спиењето, што дополнително го стимулира апетитот и желбата за нездрава храна.
Високиот кортизол го поттикнува телото да складира маснотии, особено во пределот на стомакот каде специфичните рецептори го олеснуваат нивното акумулирање. Исто така го спречува нивното разградување, па затоа салото на стомакот може да остане тврдоглаво присутно и покрај диетата и вежбањето, пишува City Magazine.
Кортизолот може да се контролира со промена на некои навики.
Квалитетен сон
Недостатокот на сон го зголемува стресот и кортизолот. Целете на 7-9 часа квалитетен сон секоја вечер. Намалувањето на сината светлина (мобилен телефон, компјутер) пред спиење исто така помага.
Избегнување на интензивни тренинзи
Интензивниот тренинг е корисен, но премногу кардио може да го зголеми кортизолот. Наместо тоа, вклучете јога, пилатес или прошетки за да го намалите стресот.
Балансирана исхрана
Гладувањето и строгите диети го зголемуваат кортизолот. Јадете редовни оброци богати со протеини, здрави масти и сложени јаглехидрати. Храната како лосос, авокадо, јаткасти плодови и темно чоколадо, во умерени количини, се особено корисни.
Медитација и вежби за дишење
Само пет минути длабоко дишење дневно може значително да го намали кортизолот. Испробајте ја техниката 4-7-8: вдишете низ нос четири секунди, задржете го здивот седум секунди и издишете осум секунди за да ви помогне да се опуштите.
Избегнување на кофеин и алкохол
Кофеинот и алкохолот може да го зголемат нивото на кортизол. Наместо кафе, пробајте зелен чај или чај од камилица, кои делуваат смирувачки.
