По скоро 30 години, Apple најави дека главниот директор за дизајн, Џони Ајв, ќе ја напушти компанијата поради лични причини. Иако Apple го губи еден од најважните и најдобри индустриски дизајнери во светот, сепак работите не се така лоши за американскиот гигант.
„Џони е многу важна фигура во светот на дизајнот и неговата улога на Apple не може да биде опишана со зборови. Од 1998 година и револуционерниот дизајн за iMac и iPhone, тој вложи многу енергија и работа во Apple“, изјави Тим Кук, извршниот директор на компанијата.
Неговото заминување се должи на одлуката тој да отвори сопствена компанија за дизајн. И покрај тоа што веќе нема да фигурира како вработен во Apple, од компанијата најавија дека двете страни ќе ја продолжат соработката и Ајв ќе биде вклучен во некои од следните проекти на Apple.
„Apple ќе продолжи да има корист од талентот на Џони Ајв преку директна соработка со него, но и со дизајнерскиот тим кој тој го состави. По толку години заедничка работа, среќен сум дека нашиот однос продолжува да се развива и се надевам на соработка во иднина“, додаде Тим Кук.
Со овие промени, беше најавено дека дизајнерскиот тим на Apple отсега ќе одговора пред Џеф Вилијамс, главниот извршен менаџер на компанијата. Токму Вилијамс имаше многу важна улога во дизајнот и развојот на Apple Watch низ годините.
За време на неговиот ангажман во Apple, Џони Ајв работеше на еден куп проекти како iPod, iPhone, iPad, Apple Watch и нивните полначи, додатоци и слично. Неговата нова компанија го носи името LoveFrom, а заедно со него во тимот ќе биде и Марк Њусон.