Властите во главниот град на Северна Кореја, Пјонгјанг, наредија петдневен локдаун поради зголемен број случаи на недефинирано респираторно заболување, објави во средата NK News со седиште во Сеул.
Во известувањето не се споменува COVID-19, но се вели дека жителите на градот мора да останат во своите домови до недела и да се подложуваат на проверки на телесната температура повеќе пати на ден.
Во вторникот беше објавено дека жителите на Пјонгјанг складирале залихи во очекување на построги мерки. Не е познато дали другите области на Северна Кореја воведоа нови ограничувања.
Северна Кореја првпат ја „призна“ епидемијата на COVID-19 во 2022 година, но до август прогласи победа над вирусот. Таинствениот режим никогаш не потврди колку луѓе се заразени со Ковид, очигледно поради недостаток на средства за спроведување на широко тестирање.
Наместо тоа, известуваа за дневните бројки на пациенти со покачена температура, кој се искачи на 4,77 милиони во популација од околу 25 милиони. Но такви случаи нема пријавено од 29 јули. Државните медиуми продолжија да известуваат за антипандемиските мерки за борба против респираторните заболувања, вклучително и грипот.
Во вторникот, државната новинска агенција KCNA соопшти дека градот Каесонг, во близина на границата со Јужна Кореја, ги интензивирал кампањите за јавна комуникација „за сите вработени луѓе да се усогласат со прописите против епидемијата“.