Свеченоста за доделување на наградите на Академијата за филмска уметност и наука годинава ја прекина низата на разнишана гледаност и стигна до бројка од 29,6 милиони гледачи на директниот пренос.
Тоа е зголемување од 12 проценти во споредба со лани, но сепак е далеку од „златните години“ и е втората најслаба гледаност во историјата на Оскарите.
Во 2018 година настанот го следеа само 26,5 милиони гледачи, бројка што ги запали алармите во ABC и во Академијата.
Годинава меѓу номинираните имаше повеќе филмови што беа хитови на боксофисот, во споредба со изминатите години.
Тоа пак, придонесе за бурни дискусии и контроверзи околу тоа колку беше заслужен Оскарот за најдобар филм за „Green Book“, но и за незаборавен оскаровски момент – настапот на Лејди Гага и Бредли Купер со наградената песна „Shallow“ од филмот „A Star Is Born“.
Годинава ќе биде запаметена и по тоа дека немаше водител, иако свечено отворање сепак имаше – Тина Феј, Ејми Полер и Маја Рудолф ја отворија вечерта.
Доделувањето на Оскарите сепак е најгледаната забавна програма во годината во САД, по Супербоул. Гледаноста на доделувањето на златните статуетки псотепено опаѓа откако го достигна врвот од 43,7 милиони гледачи во 2014 година, покажуваат статистичките податоци на Nielsen.
Најбројна публика имаше изданието од 1998 година, кога за најдобар филм беше прогласен „Titanic“. Тогаш шоуто го проследија 55,2 милиони гледачи.