Неверојатно промашување на празен гол се случи синоќа во втората Бундеслига кое дефинитивно ќе конкурира за промашување на годината.
Екипата на Оснабрик гостуваше кај претендентот за врвот, тимот на Штутгарт. Гостите се изборија за реми без голови, а можеа дома да се вратат со како планина огромни и важни 3 бода.
Во 30. минута дојде до измена кај гостите. Во игра влезе 28-годишниот напаѓач Бенјамин Гирт кој од јануари 2019 игра за клубот како позајмен од Холштајн Кил.
Токму Гирт само што влезе можеше да биде херој. Десет минути подоцна неговиот соиграч Никлас Шмит несебично го проигра Гирт кој пред себе имаше празен гол. Од прва со десна упати млак удар, но наместо во празната мрежа топката заврши во стативата.
За Гирт играњето во 2.Бундеслигата е врв во неговата кариера. Претходно настапувал во пониските лиги сѐ до шестата лига, а во сезоната 2016/17 со 20 голови во дресот на Мепен бил најдобар стрелец на третата лига Север.
За Штутгарт од 75. минута на терен беше нашиот Дарко Чурлинов кој изненадувачки беше приморан да игра како десен бек, тотално вон неговата природна позиција.
