Интер ја оправда фаворитската улога на гостувањето во Бугарија, а уругвајскиот дефанзивец ја командуваше одбраната која не дозволи изненадување.
Искусниот централен бек Диего Годин синоќа одигра 90 минути во комбинираниот состав на Антонио Конте кој триумфално се враќа од Разград. Совладан е бугарскиот шампион Лудогорец и Интер со една нога е во осминафиналето.
„Во првото полувреме ни беше тешко, имавме малку простор, но после паузата интензитетот беше друг. Дадовме повеќе и топката ја додадавме побрзо. Голот на Ериксен ни го отвори натпреварот, а падна по една убава акција со завршница која не беше лесна. Победата и двата гола се заслужени, тоа е убав резултат пред реваншот“, рече Годин по натпреварот.
Тој беше во одбраната составена од тројца играчи заедно со капитенот резервист Андреа Ранокија и Данило Д'Амброзио.
„Нашиот тим е таков што се стреми кон максимум. Важно е целата група да биде подготвена, без разлика кој игра повеќе, кој помалку. На овој натпревар сите заедно направивме чекор напред“, заврши Уругваецот.
Реваншот помеѓу Интер и Лудогорец се игра наредниот четврток на „Џузепе Меаца“ во Милано со почеток од 21 часот.