Новак Ѓоковиќ во 19:30 часот во Париз ќе игра против Унгарецот Мартон Фучович.
Светскиот рекет број 1 ќе се потруди да сруши уште неколку рекорди.
Пред стартот на турнирот, Новак говореше за актуелните теми поврзани за заминувањето во Австралија и вакцинацијата.
„Благодарен сум што се занимавам со спорт кој е популарен ширум светот. Според истражувањата на АТП, тенисот е трет во светот по популарност, го делиме местото со крикетот. На првите две места се фудбалот и кошарката. Успешен сум во глобален спорт и добивам многу големо внимание од јавноста. Ова може да донесе многу позитивни работи и бенефиции во професионалниот и приватен живот, но има и свое бреме. Имаме влијание на младите луѓе кои гледаат пример во нас и се очекува да дадеме мислење за некои теми. Јас се трудев да бидам подалеку од сето тоа, но кога ќе почувствувам дека треба да кажам нешто – го правам тоа. Јас се држам до своите принципи, човекови права и животни вредности, а тоа е злоупотребено“, вели Новак.
Во врска со Австралија Опен истакна дека ќе донесе одлука кога ќе пристигнат официјални услови од страна на организаторите.
„Што се однесува до турнирот во Австралија, ја чекам официјалната одлука па ќе одлучам дали ќе учествувам. Не размислувам само за себе туку и за сите останати тенисери. Треба да се обединиме за важните работи и да имаме ист став. Доколку го направиме тоа, ќе ни биде многу полесно да постигнеме подобри резултати“, смета Ѓоковиќ.
Новак призна дека ретко чита што пишуваат за него, но некои информации навистина го повредуваат.
„Човек сум, имам емоции. И јас правам грешки, но ме повредува неправдата и кога шират лаги за мене“, истакна Новак и додаде „и покрај тоа, никој нема да ме спречи да се борам за работите за кои сметам дека се исправни“.