Српскиот тенисер Новак Ѓоковиќ денеска не успеа да освои медал на Олимписките игри во Токио, а својата беспомошност на теренот ја покажа на бројни начини за време на мечот за бронзениот медал со Шпанецот Пабло Карењо-Буст.
Имено, на почетокот на третиот решавачки сет, видно исцрпениот Ѓоковиќ сакаше да направи нешто што неговото тело очигледно не го дозволи, па ги загуби нервите.
Откако не успеа да му го земе сервисот на Шпанецот во првиот гем од третиот сет, тој го фрли рекетот на трибините. За среќа, немаше никој на трибините поради пандемијата на коронавирус, па сѐ заврши добро откако Ѓоковиќ навистина непромислено и гневно го фрли рекетот.
Овој настан како да го поремети целосно, па го испушти сервисот во следниот гем, а потоа Карењо го потврди брејкот доаѓајќи до 3:0.
И тогаш Ѓоковиќ го загуби трпението и со рекетот ја изудира железната конструкција што ја држи мрежата.
До крајот на мечот не успеа да се спаси и дојде до заслужен пораз со кој остана без ниту еден медал на Игрите каде беше апсолутен фаворит.
Претходно Ѓоковиќ, откако изгуби од Зверев, демонстративно замина среде давање изјава за медиумите.
Јавноста реагираше на ваквите потези на Ѓоковиќ, со коментари дека еден врвен светски спортист на овој начин не остава добар пример за младите кои се огледуваат на него.