Тенисерот Новак Ѓоковиќ во неделата загуби во финалето на Вимблдон од Карлос Алкарас, кој втора година по ред го освои најскапоцениот трофеј во тенискиот свет.
Трофеите на Алкарас и Ѓоковиќ им ги врачи принцезата од Велс, Кејт Мидлтон, која вторпат се појавува во јавноста откако откри дека има рак, а на Вимблдон дојде со ќерката Шарлот и сестрата Пипа Мидлтон.
Таа со широка насмевка на лицето му го врачи трофејот на Ѓоковиќ, а тој ѝ се поклони, а подоцна и откри што ѝ рекол на принцезата.
„Ѝ кажав дека ми е мило што видов дека е добро, изгледа здраво. Исто така е добра вест за оваа земја и за Вимблдон, што принцезата е таму, се разбира, со членовите на нејзиното семејство. Ѝ даваат голема поддршка на овој турнир. Знам и дека нејзината сестра долго време играше тенис, па тие навистина ја ценат и ја сакаат играта. Го разбираат тенисот, што е одлично. Прекрасно е да се има таква поддршка од кралското семејство“, рече Ѓоковиќ, додавајќи дека е привилегија што повторно се сретнал со принцезата.
Кејт веќе неколку години им дели трофеи на победниците на Вимблдон, како покровител на Ол Ингланд клубот, а таа улога ја наследи од покојната кралица Елизабета II.
Тоа вклучува нејзино присуство на натпреварите за подигање на профилот на турнирот секоја година. Тука е и добротворниот аспект на улогата, поддржан од Фондацијата „Вимблдон“, која бара од неа да посетува локални иницијативи и спортски програми, како и да се занимава со млади луѓе.
Да потсетиме, принцезата на крајот на март преку видео објави дека оди на превентивна хемотерапија бидејќи се лекува од рак, а пред тоа имала и операција на абдоменот. Од католички Божик минатата година Кејт нема никаков официјален ангажман, но на 15 јуни, по операцијата и лекувањето, за првпат се појави во јавноста по повод роденденската парада на нејзиниот свекор, кралот Чарлс.
