Ѓоковиќ повеќе не е најдобар: Синер е прв, Алкарас втор, а Ноле падна на 3. место

За првпат од септември 2023 година челната позиција на АТП листата не му припаѓа на српскиот тенисер Новак Ѓоковиќ, кој поради повреда на коленото мораше да се повлече од овогодинешниот Ролан Гарос.

Ноле на овој турнир ја бранеше титулата освоена минатата година, а бидејќи не успеа да го зачува тронот падна на третата позиција на АТП каде моментално има 8.360 бодови.

Пред него се Италијанецот Јаник Синер со 9.525 бодови и второпласираниот Карлос Алкарас од Шпанија, кој триумфираше и на Отвореното првенство на Франција и сега има 8.580 бодови.

Четвртата позиција му припаѓа на финалистот на турнирот во Париз, Германецот Александер Зверев, а на петтото место на најновата АТП листа е рускиот тенисер Даниил Медведев.

Веднаш зад него е неговиот сонародник Андреј Рубљов, а потоа Норвежанецот Каспер Руд, Полјакот Хуберт Хуркач, Алекс де Минор од Австралија и Бугаринот Григор Димитров.

Прв надвор од топ 10 е Гркот Стефанос Циципас со 3.740 поени.

Што се однесува до македонските тенисери, на АТП листата моментално има само двајца. Калин Ивановски се искачи 4 места и сега е 414-ти со 112 поени, додека Горазд Србљак скокна 23 места до 1068. позиција со 11 поени.