Српскиот тенисер Новак Ѓоковиќ ќе добие дозвола да се натпреварува на следниот Австралија опен бидејќи му е вратена можноста да добие виза во Австралија, пишува австралискиот весник The Age.
На Ѓоковиќ не му беше дозволено да се натпреварува на последниот Грен слем во Мелбурн бидејќи не бил вакциниран против коронавирусот.
По две судски рочишта, австралиската влада му ја укина визата и го депортираше од земјата. Исто така, со правосилната пресуда му е забрането да добива виза во следните три години. Тогашниот министер за имиграција Алекс Хок објасни дека укинувањето на визата на Ѓоковиќ е „во јавен интерес“.
Новиот министер ја укинува забраната
Новиот министер за имиграција Ендрју Гилс ќе ја поништи одлуката за укинување на тригодишната виза на Ѓоковиќ.
Оптимист беше и директорот на Австралија опен, Крег Тајли.
„Знам дека Новак сака да се врати и да игра со нас. Ја сака Австралија бидејќи тука го постигна својот најголем успех. Но останува на некој друг да го дозволи тоа“, изјави Тајли.
Отвореното првенство на Австралија следната година ќе се одржи од 16 до 29 јануари. Ѓоковиќ го држи рекордот по бројот на освоени титули во Австралија, а досега има девет победи во Мелбурн. Србинот моментално е осми тенисер во светот и втор во историјата по бројот на освоени Грен слем титули (21). Над него е само Рафаел Надал кој има 22 Грен слем титули.