Во интервју, славниот тенисер Новак Ѓоковиќ си ја отвори душата и изјави дека не постои слобода на говорот, а дека другите го претвориле во лошо момче.
Српскиот тенисер си ја отвори душата во разговор за италијанскиот весник La Stampa. Сè што го мачеше изминатите месеци одлучи да го сподели и притоа беше прилично остар.
„Знам дека некои луѓе мислат дека се занесувам, дека некои работи ги правам бидејќи сакам луѓето да ме сакаат. Не е така, само сакам да си бидам свој, уникатен. Тоа е нешто што денес се губи. Не е возможно да им угодиш на сите, но ако постои политичка коректност, тогаш веројатно можеме да ги искажеме идеите со почит, без омраза, со слобода. Слободата на говор, денес според моето мислење, е само илузија“, изјави Ѓоковиќ.
„Имам еден идеален пример од оваа година, поради сè што ми се случи околу вакцината. Изразив слобода самиот да одлучам што ќе правам со моето тело и одеднаш бев етикетиран како антиваксер, а не сум тоа. Ако не припаѓаш на општиот начин на размислување, брзо стануваш лошо момче. А, тоа не е добро“, изјави Новак.
Иако е во борбата за најдобар тенисер на сите времиња, најважно му е да биде добар човек.
„Имам соништа, некои се многу големи. Најголемиот ми е да им бидам татко на Стефан и на Тара. Да разберам што значи да бидеш татко, да читаш, да дискутираш. Тоа е како работа, бидејќи никој не е роден како родител, често се фокусираме на тоа да ги учиме децата, како да ги воспитуваме, како да го градиме нивниот карактер. Верувам во фундаментални работи, работа на себе, учам да бидам смирен кога ме напаѓаат и критикуваат, учам да направам предност од моето искуство. Истражувам кои се најважните работи за децата, не само за себе. Тоа се работи за кои секој ден размислувам“, вели тенисерот.
