Новак Ѓоковиќ во големото финале по 176 минути игра го совлада четвртиот играч во светот Гркот Стефанос Циципас со 6:3, 7:6 (4), 7:6 (5).
Ѓоковиќ уште еднаш потврди дека му нема рамен во светот на тенисот - ова беше негов десетти пехар во Мелбурн и 22. Грен слем во кариерата, со што се изедначи со ривалот Рафаел Надал.
Дополнително, Ѓоковиќ го престигна Надал по вкупниот број титули во кариерата, ова му беше 93-та, а во Мелбурн стигна до 28-та последователна победа.
Така ја продолжи неверојатната традиција - Ноле не знае за пораз во финалето во Род Лејвер Арената, има 10/10, а би се рекло и неговата игра беше на тоа ниво, за „десетка“.
Така и повторно се врати на врвот на АТП листата. Циципас даде сè што можеше, но очигледно не беше доволно за шампион како Ѓоковиќ.
Од самиот старт на натпреварот Ѓоковиќ го наметна својот ритам на игра, за да се знае кој е кој на овој терен.
Во тој воведен сет, кој траеше 36 минути, не му дозволи на Циципас ниту една брејк топка.
Новак стигна до брејк во четвртиот гем за 3:1, па лесно го обезбеди. Предноста на сервисот ја одржа до крајот и на тој начин поведе на натпреварот.
Циципас успеа да си ја среди играта во вториот сет, да биде поцврст на сервис, значително поагресивен, така што Ѓоковиќ имаше многу потешка задача да добие шанса за брејк.
Нервозата некако навлезе во играта на Новак, тој побара совет од Горан Иванишевиќ како да реагира на таа ненадејна промена на ритамот во играта на противникот.
Гркот беше подобар во одбраната, а Новак ниту еднаш не успеа да добие брејк шанса.
Во деветтиот гем, по грешка на Новак, Циципас доби шанса за брејк, тоа беше и сет топка, но со одлична форхенд паралела Новак успеа да ја неутрализира, а потоа да го добие гемот за 5:5.
Набрзо стигнаа до тај-брејкот во кој Новак имаше посмирени нерви, го доби тој дел од играта со 7:4 и стигна до големи 2-0 во сетови.
Тој втор сет го одиграа скоро 70 минути, имаше многу драма, но Новак уште еднаш покажа колку е стабилен на овој терен.
Новак замина на кратка пауза, а кога се врати заигра поагресивно.
Точно е дека Циципас веднаш доби брејк, но не вредеше, Ѓоковиќ веднаш одговори со иста мерка за 1:1.
Новак играше сè посигурно, го подигна ритамот, значително ги зголемуваше ударите, особено форхендот.
Сепак, ниту Циципас не се предаде лесно, одлично се држеше.
И уште еднаш стигнаа до тај-брејк. Ѓоковиќ лесно стигна до 5:0, за Гркот да дојде до 5:3, но набрзо сè беше готово, Новак ја искористи третата меч топка за 6:5.
Поплава од емоции го погоди Ѓоковиќ по победата, но и после сето она низ кое помина минатата година во Мелбурн, депортацијата и притисокот од западните медиуми.
Плачеше, целосно се скрши, а со него плачеше и цела Род Лејвер Арена.
