Фудбалската репрезентација на Јамајка е вториот финалист на Голд купот. Јамајка во полуфиналето, во Пасадена, го совлада бранителот на трофејот Мексико со 1:0.
Јамајка успеа да му се реваншира на Мексико за поразот во финалето на Голд купот пред две години (1:3), со минимална победа.
Единствениот гол на натпреварот го постигна бекот на Њујорк Ред Бул, Кемар Лоренс во 88 минута. 24-годишниот играч го совлада голманот на Мексико по прецизно изведениот слободен удар од 22 метри.
Јамајка за титулата на Голд купот ќе игра против САД. Натпреварот ќе се одигра ноќта помеѓу среда и четврток (3:30 часот), на стадионот во Санта Клара.
