Кошаркарите на Голден Стејт Вориорс се пласираа во финалето на НБА плеј-офот на Западната конференција по четвртата победа во серија против Мемфис Гризлис.
Голден Стејт во шестиот натпревар ја заврши работата во полуфиналето на Западната конференција со резултат 110:96 и со вкупни 4:2 во победи се пласираше во конференциското финале.
Клеј Томпсон со 30 и Стеф Кари со 29 поени ги предводеа Вориорс до победа и пласман во финалето, додека на другата страна Дилон Брукс постигна 30 поени.
Во западното финале Голден Стејт ќе го чека подобриот од пресметката на Феникс Санс и Далас Маверикс, кои в понеделник сабајлче од 2 часот ќе играат мајсторка откако досега е 3:3 во партии.
Одлуката за еден од финалистите на Источната конференција беше одложена за мајсторка откако Бостон Селтикс славеше во Милвоки со 108:95 и со тоа израмни на 3:3 во серијата подобар од 7.
За тоа се погрижи Џејсон Тејтум кој постигна дури 46 поени, а два помалку на спротивната страна постигна Јанис Адетокумбо.
Мајсторката меѓу Бостон и Милвоки е закажана за утре вечер од 21:30 часот по македонско време, а победникот ќе игра против Мајами Хит во источното финале.
