„Се бројат последните часови на Герет Бејл во Мадрид, играчот на Реал ќе потпише за кинески Ѓијангсу Сунинг. Само ситници нѐ делат од финализирање на договорот“, гласеше текстот на насловната страница на доверливиот и почитуван весник Marca пред неколку дена.
Иако се чинеше како готова работа, сепак се покажа дека не е. Денеска BBC ексклузивно јави дека Реал Мадрид се повлекол од продажбата на Велшанецот и дека Гарет Бејл останува на Сантијаго Бернабеу.
Причината за ваквиот пресврт во веќе историскиот трансфер на Бејл уште не е позната, но новинарот на BBC Дејвид Орнстин тврди дека Реал дефинитивно се повлекол.
Напаѓачот од Велс се очекуваше да потпише за кинескиот клуб за неверојатна плата од 1,1 милиони евра неделно, односно неверојатни 57,7 милиони евра годишно, покрај заработката од потпишувањето на договорот, што се проценуваше на 22,2 милиони евра.
Тренерот на Реал Зинедин Зидан веќе подолго време не крие дека нема место за Бејл во неговиот тим, па ваквиот расплет на ситуацијата е многу неочекуван.