Сергеј Чизмов, директор на руската државна корпорација „Ростех“, денеска изјави дека Русија е подготвена на Турција да ѝ продаде борбени авиони Su-35.
На прес-конференцијата тој меѓу другото зборуваше за воено-техничката соработка на двете евроазиски држави, пренесуваат руските медиуми.
Чизмов на официјална Анкара ѝ ја предложи продажбата на овој тип борбен авион од руско производство.
„Доколку нашите турски колеги изразат интерес, ние сме подготвени за испорака на Su-35“, рече Чизмов.
Портпарол на американскиот Стејт департмент вчера писмено соопшти дека Турција не може да остане во програмата за американскиот борбен авион F-35, поради купувањето на рускиот одбранбен ракетен систем S-400.
Борбениот авион Su-35 од генерацијата 4++ е надзвучен авион што на пазарот се појави 2008 година. Вооружен е со 30-милиметарски митралез, како и со осум тони ракети и бомби од различни типови.