Двата силни земјотреси кои попладнево ја погодија Албанија предизвикаа голема материјална штета во повеќе делови во земјата, а последните информации говорат дека лекарска помош поради повреди побарале 37 лица.
Најголема штета е регистрирана на објекти во Драч, како и на возила врз кои паднал дел од градежен материјал од објектите. Во Драч земјотресот поделил на два дела повеќекатница, а една куќа е урната во близина на автопатот Тирана-Драч.
-Земјотресот со магнитуда од 5,8 степени според Рихтер и интензитет од 7,5 степени, на 30 километри северно од Драч е најсилен до сега по оној од април 1979 година. Почувствуван е во сите делови на Албанија и во соседните земји, наведува телевизијата Ora news.
Тлото во Драч не мирува, по двата силни земјотреси регистрирани се уште неколку со послаб интензитет.
Надлежните упатија апел до жителите на Драч да не се враќаат во домовите поради можноста од нови потреси. Улиците и плоштадите во градот се преполни со народ.
