Веќе долго време се зборува дека консумирањето на големи количини сол е лошо за телото, но новото истражување тврди дека солта не влијае само на срцевиот и крвниот притисок, туку има и многу поголеми штетни последици.
Истражувањето објавено во Nature Neuroscience вели дека јадењето на прекумерна количина сол резултира во намалување на когнитивните способности и опаѓање на менталните перформанси. Според научниците кои работеа на него, причината за ова е недоволната циркулација на крв во мозокот.
Научниците експериментираа со лабораториски глувци, давајќи им храна која содржи многу сол.
Глувците по одредено време почнале да забораваат како да излезат од лавиринтите во кои биле оставени, а по подолго време почнале и да не реагираат на допири на нивните мустаќи. Тоа им покажало на научниците дека нивните когнитивни способности се намалуваат и дека солта има големо влијание на работата на мозокот.
„По три месеци глувците почнаа да се однесуваат ирационално и сега боледуваат од деменција. Тие не можат да идентификуваат обични предмети, па дури не можат ниту да си изградат гнездо, нешто што порано го правеа инстинктивно“, стоеше во истражувањето.
Според научниците, слични ефекти можат да се случат и на човечкиот мозок доколку исхраната која се практикува е богата со сол.