Во последните 24 часа избувнаа вкупно 81 пожар, а пожарникарите и понатаму се борат со 40 кои се активни, потврдија грчките власти.
Заменикот на министерот за цивилна заштита, Никос Хардалијас на конференција за новинари соопшти дека најголемиот и најопасниот пожар е оној кој започна вчера по 13 часот и продолжи да гори во северните предградија на Атина: Варибоби, Адамес и Тракомакедонес.
Во гаснењето на пожарот се активирани 520 пожарникари, 17 теренски тимови, а вклучени се и полицајци, доброволци и локални власти. Евакуирани се 315 лица.
Според последните информации, локализиран е пожарот на Кос, додека на островот Евија пожарникарите сè уште се борат со огнената стихија. Оштетени се 76 куќи, a 15 куќи се делумно оштетени.
Грчкиот премиер Кирјакос Мицотакис денеска ги посети северните предградија на Атина, каде пожарникарите се обидуваат да го стават под контрола пожарот пред ветрот повторно да зајакне.
– На перферијата на градот владее кошмар. Главен приоритет е спасување на животите на луѓето, рече Мицотакис по обиколката на погодените места.
Претходно, грчките пожарникари кои се борат со големиот шумски пожар во подножјето на Парнас, во близина на Атина, денеска рекоа дека се надеваат дека огнот ќе биде ставен под контрола во наредните часови. „Ситуацијата е подобра и се надеваме дека пожарот ќе биде ставен под контрола во наредните часови“, соопшти противпожарната служба.
Мицотакис утрово го посети селото Варибоби, 30 километри северозападно од Атина, каде е најголема штета има од шумските пожари. Десетина куќи изгореа, а бројни објекти претрпеа голема штета. Повеќе од 300 луѓе беа евакуирани од Варибоби и уште две околни села.
Повеќе од 500 пожарникари, со поддршка на хеликоптери и авиони, работат на гаснење на пожарот утрово, а густ чад стигна и до централните делови на Атина.
Температурите во Атина и другите делови на Грција во последните денови достигнаа 42 степени Целзиусови.