Поранешниот играч на Евертон и Арсенал, а сегашен тренер во Манчестер Сити, Микел Артета, е главниот кандидат за наследник на Арсен Венгер, а покрај него се најавуваат и многу други промени во стручниот штаб на Арсенал.
Микел Артета се смета за фаворит во трката за наследник на Арсен Венгер на кормилото на Арсенал.
Поранешниот играч на Арсенал, кој во моментов е вработен како дел од стручниот штаб на Манчестер Сити, сега е фаворит за да биде назначен како нов тренер на Арсенал, откако пред неколку дена Масимилијано Алегри негираше дека ќе го напушти Јувентус за да го преземе лондонскиот клуб. Во игра беше и Германецот Томас Тухел, но тој неделава потпиша двегодишен договор со ПСЖ.
Сега фокусот се префрли на Артета, кој раководството на Арсенал го гледа како далеку посигурна опција од единствениот друг преостанат кандидат, Луис Енрике. Спортскиот директор на Арсенал, Раул Санлехи веќе разговараше со Луис Енрике и тој заедно со извршниот директор на клубот, Иван Газидис, одлучија дека барањата на Енрике се преголеми и веројатно тој ќе биде разгледан како втора опција.
Тимот на Арсенал веќе се раздели со Колин Левин, кој 23 години работеше како шеф на лекарскиот тим на овој клуб, а по него се очекува дека ќе си заминат и многу други членови на тренерскиот тим.
Освен тоа, Арсенал почна да прави измени и во начинот на работа на раководството, а извршниот директор Иван Газидис почна да бара помлади лица, по можност жени, да работат во администрацијата на клубот.